Homeહેલ્થઆ ઉપાય કરવાથી ચિકનગુનિયા અને તેની પીડા ગાયબ થઈ જશે..

આ ઉપાય કરવાથી ચિકનગુનિયા અને તેની પીડા ગાયબ થઈ જશે..

કોરોના મહામારીનો સંઘર્ષ હજુ ચાલુ જ છે, તેવામાં ચિકનગુનિયા રોગે પણ માથું ઊંચક્યું છે. ચિકનગુનિયા CHIKV વાયરસથી થતો રોગ છે. ચિકનગુનિયા રોગનો ઈતિહાસ ઘણો જુનો છે. 1952 થી 1960નાં વર્ષો દરમિયાન આફ્રિકા, શ્રીલંકા, વિયેટનામ, ઈન્ડોનેશિયા, ભારતમાં ચિકનગુનિયા જોવા મળ્યો હતો. ત્યારબાદ 2005થી ફરી તેના કેસ વધુ જોવા મળે છે.

તાવ સાથે સાંધામાં દુ:ખાવાનાં વિશિષ્ટ લક્ષણો ધરાવતો ચિકનગુનિયા નવજાતથી લઈને વયોવૃદ્ધ કોઈને પણ થતો જોવા મળે છે, કેમકે ચિકનગુનિયા વાયરસનું સંક્રમણ Aedes aegypti મચ્છરથી ફેલાય છે. મચ્છરથી માણસને અને માણસોનાં લોહીમાં રહેલા વાયરસથી મચ્છરમાં પણ સંક્રમણ થાય છે. માતાનાં રક્તમાંથી ગર્ભ પણ સંક્રમિત થાય છે.

ચિકનગુનિયા છેલ્લા થોડાં વર્ષોથી ભારતમાં વધુ સક્રિય થયેલો જણાય છે. કોરોનાના વર્તમાન સંક્રમણના કપરા સમયમાં ચિકનગુનિયાનો ઉપદ્રવ પણ એટલો જ રહેતાં લોકોમાં બેવડો ભય ફેલાયેલો રહે છે.

ચિકનગુનિયા અને કોરોનાનાં લક્ષણો, તેનો ઉપદ્રવ અને બંનેની ગંભીરતા અલગ-અલગ હોવા છતાં ચિકનગુનિયા લાગુ પડવાની સ્થિતિમાં પણ કોરોનાનો ભય સતાવવા લાગતો હોય છે. આવી સ્થિતિમાં ચીકનગુનિયાના રોગ માટે પણ લોકોમાં વધુ ફફડાટ ફેલાય છે. ચિકનગુનિયા આમ જોઇએ તો કોરોના જેટલો ગંભીર ન હોવા છતાં તેને માટે લોકોમાં ભય એટલે ફેલાયેલો રહે છે, કારણ કે તે વધુ પીડાદાયક હોય છે. ખાસ કરીને પગ, ઘૂંટણ ને સાંધાના દુઃખાવાને કારણે ભલભલી વ્યક્તિ ત્રાહિમામ પોકારી જાય એવી તેમાં સ્થિતિ સર્જાતી હોય છે.

‘ચિકનગુનિયા’ શબ્દ કિમાકોન્ડે ભાષામાંથી આવ્યો છે. જેનો અર્થ થાય ‘To become Contoured’. યેલો ફિવરથી પણ તેને ઓળખવામાં આવે છે. પરંતુ આપણે ત્યાં તેનું ચિકનગુનિયા નામ ઘણું પ્રચલિત થઇ ગયેલું છે. વિદેશોમાં તે યલો ફીવરથી ઓળખાય છે. આફ્રિકન દેશોમાંથી તે વિશ્વના અન્ય વિસ્તારોમાં ફેલાયો હોવાનું કહેવાય છે. ચિકનગુનિયાનાં લક્ષણો માટે જોઇએ તો આ રોગમાં તાવની સાથે સાંધાઓમાં દુ:ખાવો, સોજો અને જકડાહટ આવે છે. હાથ-પગ હાલી પણ ન શકે એવો સખત અને અસહ્ય દુઃખાવો તેમાં થાય છે. એ સાથે હાથ-પગ સૂઝી પણ જાય છે.

અતિશય દુ:ખતા સાંધાઓ સાથે તાવ, થાક, માથામાં દુ:ખાવો થવાની સાથે દર્દી અશક્તિ પણ ખૂબ અનુભવે છે. કોઈક કિસ્સામાં ઉબકા-ઉલટી સાથે ગેસ્ટ્રીકડિસ્ટ્રબન્સનાં લક્ષણો પણ જોવા મળે છે. આ બધાને કારણે ચિકનગુનિયાના દર્દીને ચેન પડતું હોતું નથી. એક તરફ તાવ અને બીજી તરફ અસહ્ય દુઃખાવો, દર્દીને ખૂબ પરેશાન કરી મૂકે છે.

મચ્છર દ્વારા વાયરસનાં સંક્રમણ થયાના ઈન્ક્યુબેશન પિરિયડ બાદ અચાનક તાવ અને સાંધામાં જકડાહટ અને દુ:ખાવો થતાં રોગીઓ સ્વયં નિદાન કરીને જ ઉપચાર કરાવતા હોય છે.

૭૦ વર્ષનાં મહિલા શાક-ફ્રુટ લેવા ઘરની નજીક જ ગયેલાં અને અચાનક ચક્કર આવ્યા, માથામાં દુ:ખાવા સાથે એક ડગલું પણ ચાલી ન શકાય તેવા ઘૂંટણનાં સાંધાના દુ:ખાવાની સાથે તાવની ફરિયાદ શરૂ થઇ. ચિકનગુનિયાનું નિદાન RT-PCR અને Serological ટેસ્ટથી થતું હોય છે. કમનસીબે આ મહિલાનો કોરોના ટેસ્ટ પણ પોઝિટિવ આવ્યો. ૧૨ દિવસની ટ્રીટમેન્ટ બાદ કોરોનાથી છુટકારો થઈ ગયો, પરંતુ ચિકનગુનિયા વાયરસનાં એન્ટીબોડીથી સાંધાના સ્નાયુ, સોફ્ટ ટીશ્યુઝમાં આવેલા સોજાનો દુ:ખાવો જતાં ઘણો સમય લાગ્યો.

આયુર્વેદમાં વિષમજવર માટે સૂચવાયેલા ઉપચાર યોગ્ય વૈદકીય નિરીક્ષણમાં કરવાથી ચિકનગુનિયાની અસહ્યતા અને લાંબાગાળાની અસરને દૂર કરી સાંધાના સોજા-દુ:ખાવામાં ફાયદો થાય છે.

તેમાં સાંધાના સોજા અને દુઃખાવાને ઘટાડવાની સાથે તાવ-ટેમ્પરેચરને નોર્મલ કરવાની પણ જરૂર રહે છે. આ માટે નોનસ્ટીરોઈડલ એન્ટીઈન્ફલેમેટરી દવાઓ પણ આપવામાં આવે છે, પરંતુ આવી દવાઓનો ખૂબ પ્રયોગ કરવાથી અશક્તિ, પાચનમાં ગરબડ થતી હોય છે પરંતુ હાઈગ્રેડ ફિવર સામાન્ય કરવો જરૂરી હોય છે. એટલે આયર્વેદિક ઔષધો કરિયાતું, ગળો, મહાસુદર્શન ચૂર્ણ, પટોલાદિચૂર્ણ વગેરેની મદદથી તાવ સામાન્ય થઈ શકે છે. ચિકનગુનિયાની બીમારીમાં તે સૌથી કારગર સાબિત થાય છે.

તાવ ઉતારવા સાથે વાયરસની આડઅસર દૂર કરે તેવા ઉપચાર કરવા યોગ્ય છે, જે આ મુજબ છેઃ

તુલસી – ૧ કપ પાણીમાં ૧૦-૧૨ તુલસીનાં પાન ઉકાળી, ઢાંકી રાખેલું નવશેકું પાણી દિવસમાં ૩ થી ૪ વખત પીવાથી તાવ, માથાનો દુ:ખાવો, ઉલટીમાં ફાયદો થાય છે.

આદુ – આદુનાં રસમાં મધ અથવા ગોળ ભેળવી દિવસમાં બે વખત આપવાથી આદુની એન્ટીઈન્ફ્લેમેટરી અસરથી સાંધાનાં સોજા-દુઃખાવામાં ફાયદો થાય છે.

હળદર – ૩ ગ્રામ હળદરનો પાવડર ૧ ચપટી મરી સાથે દુધમાં ભેળવી પીવાથી કુરક્યુમીનની એન્ટીઓક્સિડન્ટ, એન્ટીઈન્ફ્લેમેટરી અસરનો લાભ મળશે.

માલિશ-શેક-પંચગુણતેલ, મહાનારાયણ તેલ જેવા સંધિવાત મટાડતા તેલ દુ:ખતા સાંધા પર લગાવવું, શેક કરવો.

તાવ હોય ત્યારે બાફેલા મગનાં ૧ વાટકી પાણીમાં સિંધવ – ત્રિકટુચૂર્ણ નાખીને પીવું.

પપૈયું, નાસપતિ, કેળાં જેવાં ફળો, પરવળ, ટીંડોળા, દુધી, મેથી-પાલક વગેરે સાથે રોટલી-ખીચડી જેવો સુપાચ્ય ખોરાક ખાવો.

સરગવાની શિંગ-પાનનો સૂપ, સપ્તપર્ણીનાં ૪-૫ નંગ પાનનો જ્યુસ નિયમિત લેવો. લીલા શાક-પાનમાં રહેલાં વિટામીન્સ અને સપ્તપર્ણીમાં રહેલાં આલ્કલોઇડ્સ ચિકનગુનિયાથી સાંધામાં થતી આડઅસર ઘટાડવામાં મદદ કરે છે.

મહાસુદર્શન ચૂર્ણ ૩ ગ્રામ, યોગરાજ ગુગળ ૨ ગોળી તથા રાસ્નાદિ ક્વાથ ૧ ચમચી જમ્યા પછી દિવસમાં બે વખત વૈદ્યના નિરીક્ષણમાં લેવાથી તાવ, અશક્તિ સાથે સાંધાના દુ:ખાવામાં રાહત મળે છે.

ડૉ.યુવા અય્યર, આયુર્વેદ ફિઝિશિયન

RELATED ARTICLES

LEAVE A REPLY

Please enter your comment!
Please enter your name here

Most Popular

Recent Comments